Liturgi Kreatif Dalam Bentuk Narasi (Dialeg AMBON)

MANGHADAP TUHAN

Liturgos 1: Ayam kukuruku su biasa, sakarang ni su ganti deng HP pung alaram. Tacigi bangong par amper siang ni cuma par pi kuliah. Tapi asal bangong tempo lai? Jang sampe tidor gepe lai. Itulah “Onggo”. Dia su bangong par pi kuliah, dia mau mandi, dia pung mama su kasih siap dia pung kasbi goreng deng teh gula.

Liturgos 2: Sambil onggo mama bikin teh, onggo mama dalam hati: Tuhan e, beta pung anak onggo ni dia mo jadi Pandeta, dia angka katong pung keluarga ni supaya bangga, beta musti kasih siap teh ni supaya mangkali dia pi kuliah dia bisa tarima dosen pung pelajaran bae-bae.

Liturgos 3: Sioh Onggo luar biasa e, kasiang, ada orang yang seng pung mama, dia bangong pagi dia pi di dia mama kamar su seng ada lai, dia minom teh sandiri. Apalai yang tinggal di kost, bangong pagi uru poro saja, pi kampus do, nanti baru cari makan.

Liturgos 1: setelah onggo abis minum teh, onggo masuk kamar dan berdoa

LONCENG 3X, SEMUA BERDIRI:

P: IBADAH INI BERLANGSUNG DALAM NAMA ALLAH BAPA, YESUS KRISTUS, DAN ROH KUDUS

P+J: AMIN YA AMIN.

Semua Secara Spontan menyanyi

”Kasih dari Sorga”

Kasih dari Sorga memenuhi tempat ini

Kasih dari Bapa Sorgawi

Kasih dari Yesus mengalir di hatiku

Membuat damai di hidupku

Mengalir Kasih dari tempat tinggi

Mengalir Kasih dari tahta Allah Bapa

Mengalir, mengalir, mengalir dan mengalir

Mengalir memenuhi hidupku

MAZMUR PUJIAN

Liturgos 1: Onggo skarang su nae oto ka kampus, saat perjalanan ka kampus dari Latuhat, dia liat laut yang paling basar, dia liat aer masing yang barsih, dia liat pohon-pohon pono jalang, dia angka Hati Sungguh besar beta pung Allah.

SEMUA SPONTAN ANGKAT REEF LAGU

Maka jiwaku pun memujiMu,

sungguh besar,

kau Allahku,

Maka jiwaku pun memujimu,

sungguh besar,

kau ALLAHku..

PENGAKUAN DOSA

Liturgos 3. Itu Onggo lewat Latuhalat, coba kalau Onggo lewat Mardika, cilaka paskali, onggo mau liat aer masing yang barsih bagemana, cium akang bobou saja paling sadap e, balong lai  onggo melewati jembatan-jembatan yang pono deng sampah, untung bae jembatan di batu gantong tu akang su barsih sadiki.

Liturgos 2: eh, jang pastiu komplen onggo talalu, coba lanjut crita do,

Liturgos 1: Pas Onggo sampe di muka kampus, onggo dapa Sms katanya “ Capat Pa Talaway su maso amper 15 menit ni, capat. Onggo lari pata kaki. Pas onggo masuk dalam ruangan....

Liturgos 2: eh stop! Mari katong masuk katong pung hati saja, katong mangaku masing-masing di hadapan Tuhan apa yang katong su bikin dosa banyak-banyak tu par Antua.

Semua: ------------------teduh sesaat sambil merenungi katong dosa-dosa-------------------

MAHASISWA: kadang-kadang katong malas kuliah, kadang-kadang jua katong suka manganto di klas, Online sampe lat-lat, apalai su dapa dosen yang blajar seng kreatif, katong rasa mau tidor saja. Buku-buku jua talalu mahal, beta mama deng bapa hidop susah, mau bayar uang kuliah saja musti bauutang sana-sini. Beta su ada di kampus tapi beta tamang-tamang seng peduli dengan beta.

DOSEN: Mahasiswa ini paling suka bikin kasus, dari mulai jiplak taman punya paper, sampe jiplak beta tandatangan. Beta bilang “A” bikin “B” beta seng tau mau bilang apa par dong lai. Apa katong tlalu kras? Tlalu pake standar yang tinggi?, katong mangaku suka lalai dalam menjalankan tugas dan tanggung jawab.

SEMUA MENYANYI : DITENGAH OMBAK:

Yesus perhatikan stiap tetesan airmata, Ia mengenal hatiku yang, penuh penyesalan dosa”

Di Ulang-ulang sampai 3 x

PETUNJUK HIDUP BARU

Liturgos 1: Skarang Onggo Kuliah jam brikut, kali ini biar alpa di Pa Talaway tapi onggo langsung ka klas supaya seng alpa di Pa Hendriks Mata Kuliah Hermeneutik Perjanjian Baru

Liturgos 2: Onggo satu klompok deng Yakomina deng Yohana dapa suruh Tafsir dari 1 Yohanes 4;10,11. Ayat itu paleng bikin dong hati senang karna bisa baca par samua saat ini

Liturgos 3: Akang babunyi bagini: Mari katong samua bakusayang, barang Tuhan su kamuka sayang katong dan yang utus Antua pung Anak par jadi “Pendamai” katong pung dosa-dosa.

SAMUA MANYANYI:

”Betapa Baiknya Engkau Tuhan”

Betapa baiknya Engkau Tuhan,

kasihMu tiada berkesudahan

betapa mulia kasihMu Yesus jiwaku diselamatkan

hosana ku memuji Tuhan,hosana ku tinggikan Yesus

hosana, hosana, hosana!

BACA KABAR BAE

Liturgos 1: skarang onggo su abis kuliah, onggo seng langsung pulang, onggo pamuci sadiki di bawah pohon jambu dolo, karna dia pung tamang datang dudu deng dia, onggo bilang par dia tamang:

Liturgos 2: “tamang e, b ada galau”

Liturgos 3: “Galau knapa tamang, bisa ale crita par beta ka?”

Liturgos 2: beta ni ada kuatir tamang e, b nilai smester kamarin seng bae, b su blajar bae-bae tapi beta seng tau mangapa beta IP Seng bae, balong lai b mama engge cari uang paling susah, sioh katong orang kasiang-kasiang ne tamang. Beta jua stress katong tamang-tamang banyak seng kuliah lai, babarapa su hamil, babarapa su ilang tar tau kamana, masih banyak lai tamang e.

Litrugos 3: “Tamang ale galau banyak e, ale khawatir dalam segala hal, untung bae ale seng khawatir par Barca kalah.”

Spontan seorang berdoa pembacaan:

Baca Kabar bae Matius 6:25-34 (Tentang “Hal Kekhawatiran”

"Ibadah Fakultas Teologi UKIM"